IV Descenso de Navatas por el río Aragón Subordán

2010-05-01T10:29:00.000-07:00

Fote, fote lo día que nos facié. Lo sol bien alto, que no paré de picar dende lo empecipie y hasta que pleguemos, la chen implindo los puens voltariando y lo río a punto, que yo creyo que ya’n fa muitas de añadas que no lo miraban tantos como allora. L'agua yera escasa los días de antis, pero, pa variar, habiemos turrumbesca lo día de antis pero esta vez pa bien, pos cayé cuando más falta feba y de la millor mena que podeba ferlo, pa repuntar lo río lo chusto pa poder baxarlo sin dingún problema. Y asinas estié, las dos navatas en una horeta ibieran en lo Puen Viello; y sin de afogarse dinguno. Hasta que fagamos la edición propia de lo nuestro video (qu’esta añada si ne ve a haber uno) vos dexo lo que ha acarrazau Paco Barón y que podez veyer también en www.jaca.com. Y dende aquí li damos las gracias a Paco por lo suyo interés y triballo.

Sobre lo barranquiar y lo navatiar

2010-04-30T15:11:00.000-07:00

Ta lo costáu, en lo Escarrón, se sintiba lo troc troc de los picadós tumbando pinos. S’acababa ya lo tiempo de la curta. Los que baxaban los madés, indo y venindo unos dezaga d’otris, no paraban arrimando ta lo río, con los machos, los trallos qu’estos rastraban resoflando.

Barranquiando levarán lugo río ta baxo ixos madés ta do son fendo las navatas. Los barranquiadós, vistíus que ven con lo calzón, zamarra, sombrero viello y pelello de calollo u corderacho en las garretas –que asinas ven atrapaciaus- no han a menester pa lo triballo mas que las ganchas y, entre que todo ve bien, brincando de trallo en trallo de los que l’agua leva, ven baxando, endreitándolos pa que no pillen los zaborros. Cuando i-plegan ta do lis se ye feita bella tarquila –que con un trallo cruzáu entre bolancos ya l’han- con ixas ganchas triballan hasta que la desfan pa siguir lugo.

¡Qué chen! L’agua l’han chelada, los pies mulláus, lo triballo duro y agún lis quedan ganas de chugar cuando i-plegan ta bella badina. Fan de los madés asinas como rodillos dando güeltas y corren, corren bien templáus encima d’ellos sin cayer. Nunca se’n son vistos capuciar.

Astí baxo alguardan los navatés. Apercazan los trallos que ven plegando y los nugan bien apretáus, calando, por la forau que han pa trastarlos y bellos mas que lis ne fan, vencellos de vergueras chovens que enreligan unos ta otros. D’ixa guisa ven fendo las navatas.

Los que isón en la glera, son fendo remos. ¡Cómo la s’apañan con la estral! Encima de un tronquet menudo y largo que lugo ha a estar lo remo, sin puesto cuasi pa meter los pies, los has dali que dali.

Lugo, todos, aproveitando la primera riada que lis vienga, soltarán las navatas que isón feitas y, gubiernándolas con ixos remos baxarán con ellas pue que ta Zaragoza y más t’allá.

Ascuita la canta de los navatés:

Navatiando, navatiando

qué goyo nos fa baxar

por l’Aragón enta l’Ebro

y por l’Ebro enta lo mar.

Y asinas lo feban…, y los d’Echo los millós.

Siente esta otra:

Dende Echo y enta lo mar

navatiando so baxau;

d’otros lugás que veniban,

dezaga se’n son quedáus.

Cuando pasen por lo lugar, ya sé que tú t’asomarás enta la Cruz a vierlos…

De “De lo sulero”, de Chusé Coarasa Atienza

Asociación de Navateros de la Val d'Echo

IV Descenso de Navatas por el río Aragón Subordán

Sobre lo barranquiar y lo navatiar